瞞報扼殺知情權 港府賴皮害市民

紀律部門對外發放緊急事故訊息，目的係維護公眾利益，但荒謬嘅係，喺現時嘅發布機制……唔係，應該係瞞報機制下，將軍澳驚現「口罩刺客」，公眾被蒙在鼓裏；觀塘「撞胸色魔」重出江湖咩，市民一樣懵然不知，隨時送羊入虎口，成為下一個受害者，港府簡直就係靠害！

嗱嗱嗱，大家留意嘞，由聽日開始，隨時靠害市民嘅紀律部門唔止警方一個㗎，仲有消防處。以後發生火警、毒氣同列車事故等突發事件，消防處都只會以政府新聞公布系統蜻蜓點水式發放簡單資訊，舉例話：「一月三日下午四時，旺角大火。」至於有冇燒死邊個達官貴人就秘而不宣。

其實，傳媒係社會看門人，記者掌握更多資訊，分分鐘可以協助化解公眾危機。其他唔講吖，十年前化名「香港拉登」嘅馬照聲威脅要喺超級市場食品下毒，好彩《東方日報》記者收到消息，唔止幫警方搵出被下毒嘅食品，仲成功令馬照聲繩之於法。如果冇咗正義傳媒協助警方將狂徒緝獲，後果真係不堪設想㗎。

紀律部門篩選資訊發放，黑箱作業已經成為通病，除咗警方同消防處，廉署一樣不遑多讓，佢哋設下至少八項準則，作為是否公開案情嘅考慮指標。八項準則，即係八道關卡，鍾意就公布，對部門不利就諱莫如深，乜都佢哋講晒。

即係咁，明明案件多如牛毛，經過層層過濾之後，最終曝光嘅寥寥可數，變成「天下太平」，咁搵笨嘅瞞報機制，難怪立法會議員炮轟政府賴皮。正如學者話齋，紀律部門篩選公布案件，無非維護一己形象，但就扼殺市民知情權，隨時危及公眾安全，萬一出事，好大鑊㗎。

咪話太一叮踢爆，港府自選封鎖資訊，根本就係針對傳媒，打壓新聞自由。警方幾年前改用數碼通訊系統，惡意截斷新聞來源，話唔係別有用心都冇人信啦。

一句講晒，瞞報扼殺知情權，港府賴皮害市民。對住咁嘅政府，各位市民惟有自求多福，出入小心，太一叮祝大家二○一二年出入平安係啦，叮！