政壇：煲呔曾屢甩底輕視童軍

上禮拜五香港童軍總會百周年晚宴，主人家請煲呔曾做嘉賓，但佢無端端缺席玩失蹤，完全冇責任感。

根據童軍總會會章，特首必然係童軍嘅總領袖，職責之一係「扶植及鼓勵香港童軍運動」，但有老童軍向本報爆料，話煲呔曾咁多年嚟，似乎冇乜履行責任，好似前年年底童軍總會喺大嶼山搞咗個百周年大露營，一早出晒請柬話煲呔曾以總領袖身份出席，當日有成五千幾個童軍參加呢個盛事，而且仲有各國駐港領事在場，點知煲呔曾一個唔該玩甩底，令香港蒙羞。

又例如舊年十月底童軍總會搞大會操，佢亦冇咗影，派下屬出席就算，似乎完全無視自己總領袖嘅身份。老童軍話喺回歸前，歷任港督都好重視童軍，年年都會出席大會操，估唔到呢個優良傳統，回歸十幾年就畀煲呔曾一手摧毀。

之不過，上兩個月女童軍總會有個九十五周年紀念活動，佢老婆曾鮑笑薇係會長固然要出席，但唔知點解煲呔曾又跟住老婆去，不請自來，唔通佢對女童軍特別鍾愛？係乜嘢原因都好，結論係好符合佢大細超兼親疏有別嘅性格。最後，老童軍大嘆好彩，因為煲呔曾就快走人，呢啲冇信用嘅人，唔使再影衰童軍喎！我哋問過特首辦，但截稿前未有回覆。