政壇：搞搞政：嫻姐騷Quali借位鬧政府
新一屆十八區區議員尋日元旦日履新，當中以工聯會「票后」陳婉嫻重返政壇最有睇頭。嫻姐並冇即時落黃大仙龍上選區，反而走咗去馬鞍山參加工聯會千人行大運。有乜區議會工作大計？佢就好宏觀咁話想九龍東各個地區連接，加強區內經濟活動，同埋諗吓點樣可以活化舊啟德機場塊地喎！莫非佢個心已宏觀到去九月立法會選舉？
嫻姐安心專注搞大政策都不無道理，事關地區工作可交由經驗豐富嘅徒弟林文輝幫手，有徒弟睇檔實掂。講番行大運活動，嫻姐嘅新年願望係想班打工仔人人有工開、有人工加，仲趁機會大彈現場安排得唔係咁理想，話有條欄杆阻住台上嘉賓同台下參加者溝通，就好似政府同市民之間嘅溝通有嘢阻住咗咁。咁都食到位鬧政府，阿姐即係阿姐。
