政壇：CY撐漁農唐唐訪中產

特首參選人CY梁振英尋日一家五口去咗旺角花墟本地漁農美食迎春嘉年華，CY讚啲有機菜靚過佢屋企業餘種嗰啲多多聲，仲即場買菜、買魚又買海味，仲買咗一盤臭草返屋企煲綠豆沙添，使咗差唔多六百蚊。CY話雖然本地貨價錢係貴啲，但都幫襯係想為本地漁農業打打氣，絕對物有所值喎，又話本地漁農界嘅重要性好大，當然贏得好多掌聲啦！

CY去美食展前，上晝主動出席建仔喺金鐘添馬公園舉行嘅會慶活動，佢承認冇獲邀請，只係「路過」現場入去同啲人握吓手喎。佢又話會一票一票咁爭取選委票，已經有一定進度，對選情有信心，包括爭取建仔選委嘅支持。

另一特首參選人唐唐尋日同太太去咗柴灣杏花邨做家訪。唐唐話用咗「第一手」角度去聽下啲「典型中產」嘅心聲後，令佢明白到其實好多中產交稅多、福利少，負擔仲好大添，所以政府未來一定要審慎理財，佢仲好有心咁祝記者「心想事成、萬事勝意」。好似搞錯咗係農曆新年咁喎！