政壇：建仔驚畀蘇錦樑影衰

建仔尋日舉行二十周年黨慶，幾百人去影合照，但有人不請自來，亦有應該嚟嘅人冇到喎！喺人海之中，有建仔黨籍嘅局長同政治助理都冇到，包括話晒曾做過建仔副主席嘅商務及經濟發展局局長蘇錦樑。政界就有傳聞話，建仔為咗今年立法會選舉力保不失，點都要同現屆政府保持距離，就算黨員都冇得傾，一日喺政府入面，一日都唔可以太親密，否則分分鐘變成死亡之吻。

競爭法搞到一鑊粥

除蘇錦樑，就連民政事務局政治助理徐英偉、發展局政治助理張文韜都冇到場。二十周年黨慶，佢哋點解唔出席？有熟悉建仔嘅人士估計，局長同政助唔出現，同依家搞到一鑊粥嘅《競爭法》有關。

蘇錦樑依家主理嘅《競爭法》變成冇牙老虎，但商界仍然未肯收貨，建仔班立法會議員要向商界交代，理應向蘇錦樑發炮，但由於佢係建仔背景，搞到班議員都唔知插唔插佢好，所以就出現呢個進退兩難局面。依家仲有大半年就到立法會選舉，建仔為免到時畀人有藉口攻擊，話佢哋朝中有人都辦唔到事，所以依家已經要同班有黨籍嘅局長、政助劃清界線，扮晒冇兩句咁。

不過，建仔主席譚耀宗就否認呢啲傳聞，佢話今次黨慶只係邀請咗幾類人，包括黨中委、監委、顧問、區議員同立法會議員等，由於蘇錦樑佢哋係官員，所以冇邀請喎。譚Sir仲話，叫晒咁多個黨員嚟，邊有位企，所以一定要篩選。至於點解唔叫官員，佢就冇解釋嘞。