減排不成反添污 賠了夫人又折兵

新年新願望，人人都想平平安安，冇災冇難。瑪雅預言話今年係世界末日喎，信不信由你，但有一樣嘢可以肯定，碳排放爆燈帶嚟嘅惡果，將會令地球愈來愈烏煙瘴氣，冇人走得甩。

呢，眼前就有惡例嘞。港府二○○○年斥資七億津貼業界更換石油氣的士，話要改善空氣質素喎。眨吓眼十一年嘞，埋單計數，嚇你一驚，的士黑煙的確係少咗，弊在肉眼睇唔到嘅污染物卻大幅增加。減排變添污，港府再次捉蟲。

其實，石油氣的士催化器壽命只有約十八個月，依家全港一萬八千幾部石油氣的士中，七成五出廠接近甚至超過十年，當局話呢批「老爺的」約有八成催化器已經損壞，咁有乜法子唔搞到烏煙瘴氣吖。不可不知，受損催化器排出嘅廢氣，仲勁過柴油車。

呢，本報委託理工大學進行測試，將一個用咗六年嘅催化器同另一個用咗僅一年嘅比較，發現舊催化器排出嘅一氧化碳多咗近四百倍，氫碳化合物多咗八十倍。即係話，依家每日有過萬部裝住超齡催化器嘅老爺的士，喺港九新界周圍播毒，問你驚未！

咦，乜唔係規定的士續牌要通過廢氣測試嘅咩？唔提猶自可，一提真係要叮爆廢柴政府個鎯鎯！正如環保團體話齋，本港車輛廢氣排放標準過於寬鬆，早已不合時宜，好似石油氣車輛咁，按現行規定一氧化碳排放量唔可以超過百分之一，但呢個比例其實已經好高，學者指「可以毒死人」添。

測試廢氣本來係為咗減少排放，保護環境，但當局採用嘅標準嚴重偏低，發揮唔到監管作用，完全係自欺欺人，敷衍市民。老爺的士輕易過骨，與其叫測試，不如叫放生更貼切，污染因減得加，當局直頭係靠害，叮！

前排有國際調查指出，香港空氣質素喺全球五百六十六個城市中排尾八，唔止輸畀新加坡幾條街，連馬尼拉呢類落後城市都不如。有人質疑呢個調查嘅可信性，其實，香港空氣質素係點，唔止港人心中有數，凡係嚟過香港嘅外國人亦心知肚明，唔認空氣質素差都唔得喇。唉，港府一向將環保當做騷，從未試過真心減排，香港有乜法子唔臭名遠播吖！

廢官為藍天打氣，打到香港烏煙瘴氣，太一叮借用廣東汕尾「狗官」嘅口頭禪，「氣候逃犯」靠得住，直頭母豬都會上樹咯，叮！