CULTURE 噏：Made in Hong Kong 再發光

香港曾經有不少國際知名的本地創作，如漫畫《老夫子》，但本港經濟轉型，無論是本港製造的貨物，或由港人創作的產品，皆買少見少。幸而近年愈來愈多80後積極創作極具香港特色的作品，誓要再擦亮Made in Hong Kong這塊金漆招牌！理工大學應用社會科學系講師崔日雄認為，創作具本土特色的事物，能增加創作者對本港的歸屬感。

這次找來三位創造了具本土特色卡通角色的80後，分享看法。

Kenneth：小時候，身邊已經有好多好出色、百分百本地創作，例如漫畫《老夫子》、卡通角色麥嘜等，嗰陣已經諗，將來可唔可以創造出一啲Made in Hong Kong嘅產品呢？例如屬於香港人嘅卡通。

Berg：○八年底，我哋設計咗一款攬枕，後來仲將呢款攬枕嘅外形卡通化，變成卡通角色，覺得好cute，於是開始卡通創作，後來仲設立網頁同facebook page，定期上載自己創作嘅漫畫，藉以吸引網友注意。

陳RAP：我哋想做嘅Made in Hong Kong產品，係真正屬於香港人嘅卡通角色，所以喺角色設定、漫畫內容方面，加入好多香港元素，例如有角色係甩咗鞋帶都唔識縛嘅小朋友，影射現實生活中嘅港孩。漫畫內容就用咗好多香港人關心嘅話題，如視帝視后之爭、紫荊女俠，或者長毛喺新立法會大樓放氣球等。

崔：好多從事創作嘅年輕人，都希望透過創作反映意見，如彰顯本土特色事物，或表達對社會現象嘅不滿，咁做較易引起各界共鳴，亦可以增加創作者對本土嘅歸屬感及身份認同，對社會及創作者都有好處。

陳RAP：我哋呢類本土創作，會遇到好多困難，第一，發表作品嘅渠道不足，上網發布當然係最方便、最易流通嘅方法，但部分網站管理員發現內容稍微有宣傳成分，就會delete個post。第二，香港冇咩展覽畀我哋參加。

Kenneth：另一點係現實生活問題。有一段時間，產品銷量轉差，我哋要出去接其他設計工作，幸而近來情況好轉。不過，無論幾困難，我哋都會堅持繼續創作，希望可以衝向國際，證明畀人睇，Made in Hong Kong嘅產品，係絕對優質！

崔：網絡流通性強，成為年輕人發表創作嘅渠道。不過，香港正規嘅發表渠道好少，政府為佢哋所提供嘅資源唔多，如果肯積極推動，絕對有助推動本土創作，年輕人亦有更大發展空間。

電郵：culture@on.cc