第一代「單車王子」洪松蔭（阿松）係單車界嘅威水人物，前日佢同一班青少年分享人生經驗，話年少時已經以世界單車冠軍做目標，仲試過特登喺深水埗鴨寮街，買咗件被譽為單車壇最高殊榮嘅世界場地單車錦標賽「彩虹戰衣」老翻貨嚟激勵自己添！
阿松話，佢買咗A貨嘅「彩虹戰衣」後，着起嚟影張相，然後將張相貼喺床頭，等自己每朝起身都望到，藉此鞭策自己。憶起初入港隊訓練時，同行本來有三十個隊友，點知第一日訓練只得一半人上堂，三個月後更得番佢一個。