政壇：林公公最廢高官眾望所歸

二○一一年結束，近排各種各樣圍繞年度之最嘅選舉結果紛紛揭曉，政圈都有嘅，我哋問過議會中人對官員及政策嘅睇法，綜合四位泛民、建制派議員嘅意見，大家對政制、衞生嘅政策多有不滿，至於高官，泛民議員觀點好一致，認為政務司司長林瑞麟當之無愧，可獲最廢高官大獎！

一向鬧爆廢官嘅社民連梁國雄話，林公公係一一年最應該下台嘅高官，原因無他，舊年嘅替補機制同長期低企嘅民望已夠死喇。不過，長毛嘅長期打擊對象都係煲呔曾，何以今次唔選煲呔曾做最應下台高官呢？長毛淡淡然咁話：「煲呔曾不嬲都係o架啦，唔使問。」

另一位泛民議員、白鴿黨副主席劉慧卿，更喪鬧林公公擔任政制及內地事務局局長時強推替補機制，觸發二十二萬人喺七一上街，點知冇貶竟然有官升，講講吓，卿姐又火燒心。工聯會議員葉偉明就唔滿意勞工及福利局局長張建宗喺全民退休上交白卷、建仔嘅陳克勤就話對食衞局局長周一嶽處理內地孕婦來港產子不滿，睇嚟廢官人選都唔少。