政壇：霍震霆快閃避談爭產

已故全國政協副主席霍英東身家估計高達三百億元，其後人早前爆出財產糾紛，霍家的長房三弟霍震宇，入稟法院控告二哥霍震寰侵吞亡父嘅十四億元遺產，事件令到身為長房大哥、一向重視親情嘅體育界立法會議員霍震霆做咗夾心人，開口幫邊個都唔好，惟有喺爭產案曝光後長期潛水。

到尋日佢先至露番面，先後出席兩項體育界活動。不過佢喺兩項活動都極速離場，成功避過記者追問家族爭產官司。

霍震霆尋日朝早首先出席一項除夕龍舟活動擔任主禮嘉賓，可能為咗避開記者，佢左一句公務繁忙，右一句趕時間，要求主辦單位將原定喺十一點舉行嘅下水禮，提早半個鐘開波，幫龍舟點完睛後就極速「鬆人」。

霍震霆下晝再到沙田體育學院撐本港精英運動員，活動期間照例唔接受訪問，活動結束後更趁其他嘉賓離場同接受傳媒訪問時，極速經秘道離開，不但班記者搵勻全場都搵唔到佢，連工作人員都話唔知佢幾時走咗。