政壇：煲呔曾離奇甩底辦私事？
新政府總部疑惡菌滿天飛，煲呔曾前日離奇缺席香港童軍總會百周年晚宴，特首辦發言人只係話佢「有啲事做」，佢係咪有病入咗院都拒絕否認或證實，各界揣測佢係咪好似教育局局長孫明揚咁中招，甚至有人懷疑佢係咪秘密造訪過深圳並感染禽流感……
隱蔽蹤影超過廿四小時嘅煲呔曾尋日下晝終現身，去咗沙田體育學院擔任精英運動員協會活動嘅主禮嘉賓，當時天氣尚算和暖，其他嘉賓都輕裝上陣，佢就着咗件頗厚嘅超高樽領冷衫，包實晒條頸。
煲呔曾喺活動後本來諗住急急腳走人，但成班記者不斷追問佢嘅身體狀況。佢解釋，前日甩底同佢嘅身體狀況無關，又話自己早幾日已知聖誕節有私人事務要處理，但由於要上京述職，冇辦法之下惟有延遲處理「嗰件事」，到尋日點都要抽時間做埋。
尋日天氣尚算和暖，但煲呔曾就着住件頗厚嘅超高樽領冷衫，令失蹤事件愈描愈黑。