政壇：傻強死攬人仔水泡

二○一一年畫上句號，過去一年環球金融界波濤洶湧，財經事務及庫務局局長陳家強尋日總結二○一一年經濟大形勢時，都預料問題唔會喺短時間內解決，不過傻強有絕招，就係繼續靠中央打救，用人民幣業務抗衡金融危局。傻強仲反擊有關本港金融獨大、其他產業慢慢枯竭嘅指摘。不過，佢嘅解答充其量只係話金融業請唔少人，對澄清金融業非獨大毫無幫助。

傻強喺一個電台嘅家書節目中撰文，細述二○一一年嘅經濟大事，仲好詩意咁從陽春三月數到八月炎夏、金秋十月甚至銀杏樹黃葉飄落嘅十一月，講嘅當然係中央援港嘅人民幣業務，佢話依家美歐經濟都有暗湧，歐元危機會持續一段時間，香港應對外圍金融危機時，更要把握百年難得一遇嘅人民幣發展商機。

僱員多達22萬

佢講到明，中央政府支持香港發展成為離岸人民幣業務中心係我哋嘅強心劑，仲話二○一一年係本港拓展人民幣業務嘅豐收年。得咗好處，開心係難免嘅，但傻強卻急急澄清香港唔係金融獨大，佢強調，香港金融業請咗二十二多萬僱員，仲話三分之一嘅業內僱員係高中程度，負責文員、支援等非專業職務喎。

可惜，佢愈想澄清金融冇獨大，但又要大力發展人民幣業務，咁樣點算產業多元化呢？講到尾，反而令人覺得金融業只會愈嚟愈大噃。

新嘅一年已經來臨，傻強等高官都好應該反思吓，當人人都話新年進步時，香港嘅產業點樣先可以進步？淨係死攬中央援港嘅金融救生圈，係咪可以應付未來嘅挑戰呢？