口岸處處陷阱 北上步步驚心

羅湖口岸巴士站前日發生奪命車禍，五名途人成為輪下冤魂，包括三名港人，場面之震撼，令人慘不忍睹。死亡陷阱離過境關口僅半步之遙，港人北上步步驚心，一個唔好彩，隨時樂極生悲魂斷異鄉。

正所謂，意外皆因人禍起。深港交流愈來愈頻繁，各個口岸旅客不斷增加，但交通配套設施唔止跟唔上，甚至連最起碼嘅安全標準都達唔到，搞到人車爭路，險象環生，有乜法子唔出事吖。

嗱，好似呢次發生慘劇嘅羅湖口岸巴士站咁，入面有近三十個站頭，居然連斑馬線、指示牌呢啲行人過路設施都冇。站內車路狹窄，但轉角位並冇裝設「魚眼鏡」，巴士司機離開站頭同轉彎，對周圍情況完全盲摸摸。

仲有呀，因為缺乏接駁巴士站嘅行人路，就算有隧道，數目少不特止，指示牌亦唔顯眼，好多乘客焗住學劉翔冒險跨過欄杆，穿過行車路入站。安全配套要嗰樣冇嗰樣，司機揸車斷估，行人過路簡直搵命博。

叮！深圳當局成日吹水，話好快就會超越香港，點知巴士站亂象叢生，管理連非洲都不如，簡直係羞家。

羅湖口岸險象環生，愈來愈多旅客出入嘅深圳灣口岸亦唔好得去邊。最離譜嘅係，上落客安排極之無厘頭，關口對出嘅泊位無人問津，旅巴要去到冇雷公咁遠嘅路邊畀過關客上落，旅客扶老攜幼、大包小包，仲慘過走難。而皇崗口岸仲牙煙，旅巴泊位車頭位置有個小斜台，萬一司機大吉利是踩錯油門，羅湖口岸慘劇隨時重演！

口岸死亡陷阱唔止巴士站有，羅湖口岸行車天橋前排亦被本報踢爆驚現一條闊到可以將成隻成年人手掌插入去嘅大罅隙，隨時導致車毀人亡，問你驚未！

話時話吖，挨年近晚，係港人北上高峰期，加上幾十萬內地民工回鄉過節，到時各口岸尤其係羅湖嘅人流勢必爆到七彩，今次巴士站致命車禍已經敲響警鐘，如果深圳當局仲係懶懶閒，慘劇可能陸續有來。

計太一叮話齋，港府對內地口岸安全唔係無能為力，而係大把嘢可做。除咗宣傳教育，提醒港人北上注意安全，最緊要同內地加強溝通，萬一再有同類事件發生必須保障港人嘅權益，千祈咪學羅湖口岸車站處理危機咁冷血咁不負責任吖，叮！