政壇：政商定格：東華新舊舵手歎意菜交流大計
明年四月將榮升東華三院主席嘅Viola陳文綺慧，日前相約東華前主席阿John李三元去食意大利菜，交流未來大計。
佢哋都係資深「東華人」，相識十年，好老友。阿John派定心丸話，交棒後好少左右東華內政，但只要Viola開到聲，一定瞓身支持。阿John年幾前重返中大校園讀歷史學碩士，眨眼已畢業，成績仲名列前茅添。歷史博大精深，佢話愈讀愈有癮，心思思想拎埋個歷史學博士學位，事關大公子李曠怡已接掌家族皮革生意，打理得有聲有色，佢大可放心做快樂書生。
陳文綺慧（左）同李三元（右）品嘗星級意菜。
鎮店紅蝦意粉，蝦肉彈牙，意粉爽口煙韌。
海鹽焗澳洲鱸魚鮮甜嫩滑。