政壇：搞搞政：傻強環保橋截議員濫問

夕陽政府最後一份財政預算案明年二月公布，預算案出台後，立法會議員都會入紙提問題，近年提嘅問題愈嚟愈多，夕陽政府中人早就有怨言。

當然夕陽政府唔能夠阻止議員問嘢，而財經事務及庫務局局長「傻強」陳家強尋日畀咗封信立法會，話政府一直以嚟都應承立法會財務委員會開特別會議審議預算案前，頭一千二百條問題獲優先處理，之但係當局嘅時間同資源有限，議員嘅問題又一年比一年多，所以現行做法要改喇。

佢仲專登以數據表配合折線圖，解構○七年至今，議員提問嘅數目增加走勢，其實一句講晒，就係由二千七百幾條增至近四千條；然後佢仲話單係今年答議員用嘅紙，就多達一萬五千四百幾頁，總之講到好委屈咁。於是傻強提議，議員最好用電子方式問，咁政府就答應至少喺開會前一日，用電子方式答頭三千三百條。相信冇人會反對減少用紙，即係斬少啲樹，傻強諗到新橋以環保為名，暗寸議員為實，議員確實好難說不。