深圳高鐵新時代 香港發展如龜爬

行路上廣州，代表做事堅毅不拔，定係做人傻傻更更？答案見仁見智。不過，有一樣可以肯定，就係行路上廣州速度慢過蟻躝。咁今時今日，香港人上廣州嘅快捷途徑又有乜選擇呢？嗱，啱啱多咗一樣：搭高鐵。

廣州至深圳高鐵剛剛通車，列車以最高時速三百公里馳騁於深圳同廣州之間，象徵雙城發展一日千里。香港市民以後由深圳搭高鐵上廣州，最快只需三十五分鐘，比依家節省一半時間。大家可以感受風馳電掣嘅高速快感之餘，慳出嚟嘅時間仲夠做多次腳底按摩添。

當然，廣深高鐵惠及港人，但最大受益者梗係廣州同深圳嘅市民啦。尤其係後者呀，正式邁向高鐵時代，唔止城市形象提高咗，對經濟同民生亦會有唔少裨益。

即係咁，深圳同廣州長足發展，一日千里，港府高官唔知有冇少少斯人獨憔悴嘅失落感覺呢？呀，差啲唔記得同大家講，廣深高鐵全名其實叫「廣深港高速鐵路廣深段」，即係廣深港高鐵位於內地嗰一截。咁香港嗰截呢？對唔住，仲未見影！

以前啲人鍾意用龜兔賽跑來比喻香港同內地城市嘅發展形勢，香港係健步如飛嘅兔仔，內地係舉步維艱嘅烏龜。依家呢？龜兔賽跑嘅比喻依然入木三分，不過角色就對調咗，喺港府議而不決、決而不行嘅施政作風下，香港發展慢如龜爬，連起條鐵路都龜速過人。如果靠佢，香港人真係要行路上廣州，叮！

話時話，香港大型基建蟻躝龜爬，廣深港高鐵進度落後形勢亦只係冰山一角。其他唔講吖，港珠澳大橋拖拉廿年，本來終於準備動工，居然因為港府環評甩漏，被人以司法覆核煞停半年。港府咁樣推動跨境基建，話佢係行路上廣州，一啲都冇錯。嗱嗱嗱，港府唔會以為太一叮讚緊你意志堅毅吖嘛？

港府興橋建路超低速，日前裙拉褲甩宣布廣深港高鐵香港段開始動工。而港珠澳大橋更加要壓縮工程，以追趕完工限期，以免將來珠海同澳門大橋落成之後，香港仲係起緊橋躉，到時Ｙ形大橋變咗Ｖ形斷橋，咁就醜死人咯。

不過，咪話太一叮唔提醒港府，趕工還趕工，安全第一最緊要，千祈唔好貪快而粗製濫造呀。溫州高鐵慘劇導致死傷枕藉嘅教訓，港府應該仲記得o架，萬一提速趕工嘅高鐵出現後遺症，你哋一定走唔甩o架，叮！