SUN世代:鐘錶業傳人生意踩過界

根據中國人傳統,長子嫡孫要繼承祖業,何智軒(Andy)自小已被灌輸「大個仔要繼承祖業」的思想,四歲人仔便跟爸爸出外傾生意,命運好像沒有讓他選擇的權利。順應命運安排,年紀輕輕已要為家族的鐘錶生意奔走,但他未感壓力,反而愈戰愈勇,致力發揚祖業的同時,又不斷為公司拓展新業務,踩入飲食界及教育界大展拳腳。

「其他細路係聽童話故事長大,但我就聽生意經大!」身為家中長子,Andy由童年起已被培養成為家族生意的接班人,年僅四、五歲便跟隨爸爸外出應酬傾生意。爸爸又不時與他分享生意之道,「雖然嗰時太細聽唔明,但就畀咗個訊息我,就係我有責任繼承祖業。」

Andy的家族經營鐘錶生意,在內地設有鐘錶廠,在香港又開設了日式食肆。縱然難逃「宿命」,但他希望活出精彩人生,體驗更多不同的經歷。中五畢業後,他往澳洲升學,當時潮流興IT,他任性地棄商科選讀電腦系。在澳洲生活五年,Andy學會獨立,為日後應付生意危機奠下基礎。

學成歸來,Andy未有立即回巢,反而到電腦公司擔任程式員,「讀電腦當然諗住試吓做呢行啦,搵啲實踐嘅經驗。」天生好動的他很快後悔,「我好怕悶,我鍾意對人、對外,要我日日坐喺部電腦前面,我真係唔得,唔係好啱我嘅性格。」

睇好內地教育市場

外闖兩年後,Andy被爸爸急召回巢,職位不是董事或CEO,而是做巿場部經理,「都係屋企生意,反正我鍾意對人!我做對外工作為主,好似鐘錶生意咁,我會主力負責外國客,成日會飛去歐美開會,搞鐘錶展覽會,仲幫公司去瑞士鐘錶展搞展銷會。」

但Andy接手家族生意初期卻遇上重重困難,既不熟悉內地管理文化,又不明白內地工廠如何運作,結果處處碰壁。○八年金融海嘯,對他來說更是一個大衝擊:「我哋啲客全部都係歐美,金融海嘯,歐美經濟唔好,我哋無咗好多客!再加上中國經濟起飛、農村城巿化、人民幣上漲,工廠嘅經營成本增加咗好多,真係好吃力!」

欠缺營商經驗,處理問題時往往無從入手,Andy決定重返校園,到上海修讀工商管理碩士,除了學習營商知識外,還可擴闊人脈網絡:「喺內地做生意,人脈關係非常重要,我識咗好多國企高層同高幹子弟,做生意真係方便好多!」

捱過重重難關後,諗頭多多的Andy希望在飲食界有所作為,為公司設計了不少新計劃,其中一個是將紅酒結合日菜。此外,他還睇好內地教育巿場,計劃推出英語教材幫助內地兒童:「雖然屋企做鐘錶,但我希望業務可以再多元化啲!」

Andy's Profile

現職:歐美時集團巿場部經理、金田飲食集團巿場部經理

興趣:旅遊、網球、品酒

學歷:澳洲新南威爾士大學電腦系學士、上海交通大學工商管理系碩士

第一手消息請下載on.cc東方互動iPhone/iPad/Android Apps


「Money18免費即秒股票報價網站」現推出8升級功能,財經資訊,實時實發!

趙燕萍

繼承家族生意重任的何智軒,為發揚祖業盡心盡力。

Andy(左一)曾與碩士同學到外地進行交流活動,增廣見聞。

Andy(中)碩士畢業,父母特別抽空出席其畢業禮。