政壇：肥亨嫁女High足幾個月

尋晚Boxing Day，亦係中策集團主席馬時亨嫁女嘅大日子。大女Christine馬露明同俊朗醫生Kevin劉仲恒閃電結婚，筵開近五十圍，城中超級富豪、政商界猛人雲集。

婚禮分上下兩場，下晝二點先喺酒店註冊，逾四百位嘉賓到賀，見證蜜甜時刻，前財爺梁錦松同肥亨係沙煲兄弟，派出仔女做花童。一對新人均為虔誠基督徒，會場布置成小教堂。Christine同Kevin真情剖白，訴說相識經過，聽到班姊妹眼濕濕，新娘子細妹馬露玲更感動落淚，反而肥亨最淡定。

Christine同老公拍拖一年就閃婚，新娘子話兩人其實認識兩年，佢欣賞老公為人細心、體貼，Kevin就讚太太敢於實踐夢想開辦英語學校JEMS，對佢一見鍾情喎。一對新人應記者要求即場「咀嘴」，更錫足十幾秒，保證大家影到相。講到婚後「造人」，兩人就話順其自然，等神嘅安排。

肥亨初次做外父，佢話high足幾個月，口水肩都換咗八條，熱愛高爾夫球嘅佢不忘趁接新娘環節考考女婿，要佢推桿入洞，幸好Kevin成功過關。