政壇：超級區會選舉 公文袋先出局

立法會五個區議會超級議席下年即將誕生，由於佢哋嘅選民基數高達三百萬，邊個做到超級議員，就可以挾民意以令天下，聲勢唔比下屆特首低。泛民嘅白鴿黨同民協都虎視眈眈，唯獨公文袋諗住打退堂鼓，咁咪即係提早出局囉！

超級議席一定要係現任民選區議員至可以參選，但區選過後，好似陳淑莊等多位具知名度嘅公文袋中人，紛紛敗陣而回，連黨內稍有星味嘅第二梯隊郭榮鏗都輸埋。喺人才凋零嘅局面下，黨內本來討論過，由資深區議員陳琬琛或由「老外」司馬文披甲上陣，但兩人勝算唔高，分分鐘會拖累其他人選情。

面對三百幾萬選民

過到人選呢一關，都未必過到第二關，因為參選資格要十五個民選區議員提名，但佢哋現時得七個，點都要向其他泛民借票。白鴿黨唔一定肯借，民協亦自身難保，所以目標得番雄霸新界東嘅新民主同盟。同盟有八票，借畀公文袋啱啱好，但同盟係咪會放下身段幫公文袋抬轎，好視乎公文袋用乜嘢同佢哋交換。

最後一樣亦係最重要一環，就係「缺水」。超級議席要面對全港三百幾萬選民，普通地區直選經費上限約二百萬，但超級議席已跳升至六百萬經費上限，如果銀彈唔夠，好難做到全港性宣傳，屆時點都比對手蝕底好多。公文袋經過港珠澳大橋案同外傭居港權案後，民望同支持度大跌，吸金力已大不如前，所以黨內已有一股聲音講到明，唔想個黨踩隻腳落去超級議席，以免賠了夫人又折兵。咁又係呀，偷雞唔到蝕揸米，公文袋就更加萬劫不復。