縱容領匯狂加租 房署害人終害己

房屋署管轄全港公屋，係全港最大業主，但原來呢位大業主已經淪為落難迫遷戶。

實情係咁嘅，房署位於荔景邨嘅屋邨辦事處搬遷。本來喬遷係喜事，但原來係搬回三十六年前嘅舊有位置，地方吊腳唔在講，出入仲要經過一條百級樓梯。除非閣下有被虐狂，如果唔係，一定唔會覺得係風涼水冷好地方囉。

好嘞，新辦事處環境差劣，點解房署仲要攞苦嚟辛？原來，公屋商戶被領匯瘋狂加租逼到走投無路嘅淒苦慘況，房署一樣受番晒。根據屋邨通訊解釋，辦事處斷租係因為領匯月租「數目不菲」。簡單啲講，即係房署捱唔起貴租，溜之大吉。

嗱，領匯殘民自肥，大批商戶被迫成為港版血淚拆遷戶，呢樣已係街知巷聞，諗唔到連一向花公帑洗腳唔抹腳嘅官僚部門都一樣頂唔順。唔講唔知，全港四十六條房署屋邨嘅辦事處屬於領匯物業，○五年起至今已經有四十四間加入港式拆遷戶大軍。領匯領匯，房署唔知有冇少少領會到小商戶被領匯逼上絕路嘅痛苦心情呢？叮！

不過，房署被領匯趕盡殺絕，都冇得怨咯，事關佢哋係作繭自斃，一啲都唔抵可憐。港府當年為卸包袱，將屋邨商場交畀領匯管理，之後就闊佬懶理，就算眼見領匯殺雞取卵瘋狂加租，亦都關人個關。好嘞，房署養大咗個發錢寒嘅不肖子，反而被攆出家門，流落街頭，唔知算唔算係現眼報呢？

昔日商戶被迫遷，今朝君體也相同，房署自食苦果，可惜最大受害者始終又係邨民。荔景邨新辦事處位置吊腳，以後邨民交租、求助，最遠要行兩個巴士站路程，而嗰條「百步梯」對長者嚟講更加係一步一驚心嘅征途，簡直苦不堪言。萬一入到辦事處時上氣唔接下氣，求助隨時變求救添。

房署有坐擁金山銀山嘅港府庫房做後盾，都話頂唔順領匯瘋狂加租，過去幾年商戶嘅苦況可想而知。所以話啫，房署縱容領匯魚肉市民，簡直係害人害己。你知啦，堂堂房署被人迫遷，好醜o架。

咁啦，房屋署署長栢志高，下次商戶上街抗議領匯加租，預個頭排靚位畀你，若然可以令領匯收斂番啲，咪當將功贖罪囉，叮！