政壇：搞搞政：建仔條o靚 爆黨針對傳媒

政黨銳意培植新人，年僅三十二歲嘅青年民建聯主席周浩鼎一直都係建仔重點栽培對象，日前仲獲政府委任為離島區議員，但佢不時都會走遠咗，同個黨唔夾嘴形。

尋日佢喺城市論壇台下發言，話纏擾行為主要係規管癡男怨女，唔應該有行業獲得豁免，包括新聞界，又話法例通過後，記者可以喺庭上用合理行為作為抗辯理由，擔心如果為新聞界開咗先例，其他行業都會跟住要求豁免。佢可能講得比較直，說穿咗建仔嘅立場，建仔嘅立法會議員葉國謙喺立法會政制事務委員會上，只係話新聞界應否豁免，要諮詢公眾，但強調要維護新聞自由。

其實，喺幾個月前，周浩鼎喺城市論壇上直斥政府應該考慮係唔係仲要喺民意一面倒反對嘅時候硬推替補機制，搞到葉國謙要急急腳出嚟澄清建仔唔支持押後立例。事隔幾個月，又係周浩鼎、又係城市論壇、又係同葉國謙！嘩！仲要幫佢補幾多次鑊呀？睇嚟建仔班核心根本管唔掂班o靚喎！