政壇：吳永嘉首爾豪食懶理減肥
趁住聖誕節假，廠商會副會長Jimmy吳永嘉帶埋老婆同好友合組「首爾瘋狂美食團」，喺老友帶路下，佢哋冒嚴寒到訪多間地道小店，大擦產自濟州島嘅生蠔，Jimmy話傳統嘅食法好講究，先拎起一片泡菜，包住生蠔同醃豬腩，再加入蝦膏汁，入口啖啖甘香。
跟住朋友再帶佢食泡菜醃生蟹、BBQ烤大腸、韓式燒濟州島玉魚，每味餸都喺香港難得一吃。機會難逢，努力減肥嘅Jimmy都放下禁忌，盡情擦餐勁。臨走前，佢嫌未夠喉，喺機場附近嘅樂天超市最後衝刺，狂掃新鮮泡菜生蠔、韓國牛扒同甜紅蘿蔔等，打包上機。
烤牛大腸喺香港難得一吃，吳永嘉盡情大快朵頤。
韓國生蠔正合時令，配泡菜及醃豬腩肉一齊食，正斗。（被訪者提供）