政壇：鬍鬚曾閉關製垃圾

唔經唔覺，聖誕假期放埋聽日就完，但財爺鬍鬚曾就話，聖誕節對佢嚟講只係一年一度嘅閉關日子。尋日佢喺自己個網站大吐苦水，話雖然聖誕有假放，不過放假唔係為休息，暫別辦公室嘅佢，只係轉個場喺屋企嘅書房，為嚟緊二月一號公布嘅財政預算案作戰。

鬍鬚曾話，預算案嘅第二階段諮詢已經開始咗一個月，佢喺意見收集嘅工作上大有收穫，依家做緊嘅就係要整理意見，鬥份初稿出嚟，而鬥一份預算案一啲都唔容易，有咗初稿之後仲要同唔同嘅政府部門傾，來來回回要做好多修補，仲自爆上年嗰份預算案就有十稿。

得番40日趕工

改咗十次，都係改咗份史上最廢嘅預算案出嚟，而且喺公布後改第十一次，人人派六千蚊至有人肯收貨，事後仲畀人狂轟亂派錢，而呢筆錢拖咗幾個月至開始派。

今次份預算案要改幾多次雖然仲係一個謎，但可以肯定嘅係，今年草擬預算案嘅時間比上年少。上年預算案二月尾公布，即使鬍鬚曾聖誕至發功都仲有差唔多六十日畀佢慢慢磨，但今年預算案二月一號公布，鬍鬚曾依家得番唔夠四十日，時間足足少咗三分一。咁計法，上次可以有六日改一次稿，依家平均只有四日就要改一次，連鬍鬚曾都話：「嚇咗一跳！」

大家試諗下，上次嗰份時間多啲，佢都推咗份史上最廢嘅預算案出嚟，根本係一份垃圾，以佢能力有限，呢次時間仲倉卒啲，又點可能扭轉到劣勢？誠如佢所講「嚇咗一跳」，係咪預言遲啲佢推出嚟嗰份，比已經係垃圾嘅史上最廢預算案更垃圾？