政壇：項明生扮柯南不敵台魔女
遊戲展最多人觀賞嘅項目一定有Cosplay（角色扮演）份，尋日亞洲遊戲展搞咗個中港台大賽，玩咗Cosplay五、六年嘅潮流達人項明生（James）就扮演著名嘅漫畫《名偵探柯南》主角江戶川柯南，佢身穿一套小學生校服，外表頗為滑稽、搞笑，佢套裝束係搵裁縫師傅度身訂造，再加上大框眼鏡、特大紅煲呔及偵探必備嘅放大鏡，佢都好滿意效果。
不過，佢幾好心機扮，都唔及得過江龍參賽者、台灣美女Cosplay組合，台灣女子三人組因擁有天使面孔與魔鬼身材，甫上台即轟動全場，作為評判嘅James亦順應民意，頒咗個人氣爆燈獎畀佢哋。
項明生（右）生動演示加大碼嘅名偵探柯南，身旁台灣美女三人組因擁有天使面孔與魔鬼身材，甫上台即轟動全場。
其實幾位本地參賽者扮相亦非常出色，但最後都係輸咗畀台灣代表。