兩周三故障 纜車吊吊揈

提起東涌昂坪纜車，有兩樣嘢最深入民心。水晶車廂？世上最長吊索？都唔係。開估，第一樣梗係特首參選人唐英年嘅「昂坪衫碌拎」笑話啦，自此一役，佢嘅唯我獨豬形象街知巷聞；第二咯喎，就係纜車故障頻生，受困「半天吊」已經成為唔少遊客同市民嘅難忘經歷。

呢，前兩日之嘛，昂坪纜車又發生機件故障停駛。四百名乘客被困車廂十幾分鐘望天打卦，另有千名遊客被迫滯留昂坪市集，餐風飲露兩小時。即係咁，昂坪360，纜車頻頻停，發生故障已經唔係新聞，但今次離譜到兩個星期內三度出事，你估真係玩咩？

最離譜嘅係，昂坪纜車今個月七號先至完成首階段年度檢查，點知第二日就有零件出事，仲要一炮三響輪流爆，纜車公司管理層實在有必要自我檢討一下。

嗱，纜車事故可大可小，千祈唔好掉以輕心呀。高空半天吊，遊客食驚風散唔在講，人哋一場來到感受「動感之都」，點知搭正架纜車郁都唔郁，真係好鬼掃興o架。到時香港嘅國際形象受損，旅遊業塊招牌更加搖搖欲墜，纜車公司就係香港罪人。你哋都唔想學電霸咁，日日被市民踩上門抗議o架！

其實，昂坪纜車半天吊嘅驚險場面不斷上演，若然似電霸咁被市民鬧爆，其實都偷笑啦，最驚萬一好似汕尾烏坎村嘅貪官咁，被人叫「血債血償」，咁就大吉利是咯。唔好唔記得，昂坪纜車四年前曾經發生車廂高空墮地嚴重事故，好彩當時係非營運時間，車上冇乘客，先至冇搞出人命，但唔係次次咁好彩o架，唔通纜車公司真係唔識驚嘅？

話時話，昂坪纜車故障頻仍，實在令人難以理解。正如有遊客話齋，纜車好多旅遊城市都有，更加唔係乜嘢高新科技，點解香港搞到甩甩漏漏，唔係呢樣損壞，就係嗰樣失靈？到底係纜車鈍鐵不化，修無可修，定係管理層學咗唐唐吊吊揈，對纜車安全唔嗲唔吊呀？如果真係咁嘅話，唔該快快痛改前非，否則，萬一搞到車毀人亡，咁就太遲喇。

總之，纜車公司必須快快查找不足，如果機器老化就更換，檢驗程序粗疏就改善，不過，如果係管理層出問題咯喎，咁就勞煩各位自我消失，退位讓賢，唔好阻住地球轉，叮！