政壇：梁志堅淚眼告別新世界
舊年十二月啱啱退任新世界執董嘅集團開國元老梁志堅，一年後嘅今日，就連非執董同首席顧問都唔做。正式告別做咗四十年嘅新世界。堅叔話好多謝鄭家純畀機會佢做嘢，其實早喺今年一月一日起佢已正式退休，依家交代妥當咪辭任囉，講到佢都有啲眼濕濕。
堅叔語重心長話：「我係落手落腳做嘢嘅人，事事親力親為，出任顧問冇得樣樣跟足，問起意見又要答，好似指指點點人哋做嘢咁，唔太適合自己性格。其實鄭家純先生都有叫我做多一、兩年先，不過我想趁聖誕、新年等長假期休息吓，但暫時冇計劃出埠，等過完農曆新年再考慮。日後新世界有咩要幫手畀意見，都會應承。」佢已同時辭晒新世界發展同新世界中國嘅非執董，一月一日起生效。