政壇：張曼娟為文化沙漠「平反」
四十位本地同台灣著名作家尋日為一連八日免費聖誕書展開鑼撐場，當中包括台灣新聞文化中心主任兼知名作家張曼娟。佢話好鍾意香港聖誕節日氣氛濃厚，加上呢個「購物天堂」喺聖誕期間，好多商戶都會大減價，令佢同台灣來港嘅朋友玩到樂而忘返。
雖然來港只有兩個半月，佢已感受到香港並唔似大家所講嘅「文化沙漠」，因為該中心剛舉行冇耐嘅「台灣月」上，幾乎每個活動都爆場，參加者仲來自唔同年齡層，令佢感覺到港人真心喜歡台灣文化。
咦！佢咁講有啲可圈可點喎！咁咪即係香港人鍾意台灣或外地文化，反而唔撐香港嘅本土文化呢？
一年將盡，佢希望中心未來可以吸引更多人關注台灣文化，而自己就會喺新年之後再續寫作之路。佢透露下一部著作會同香港有關，因為活潑多變嘅香港畀到佢好多靈感喎！
設計圖片及對白