政壇：IT界選委狂寄信毀樹木

每次選舉都耗費唔少紙張做候選人宣傳單張，次次都斬咗幾千棵樹。啱啱完成嘅選舉委員會選舉亦造成幾十噸廢紙。環保觸覺尋日踢爆，各選委界別中以資訊科技界最唔環保，六十一個候選人夾埋寄出咗二十七萬份宣傳郵件，平均每名選民收到四十三封，信箱細啲都畀佢塞爆。

好似獨立候選人Johnny吳傑莊咁，每個選民都寄一隻磁碟出去。由建仔葛珮帆帶隊嘅ICT動力亦唔好得去邊，二十四個候選人已每人一封信，部分成員好似佢咁，仲要自己寄多封，然後二十四人一齊再又寄一封。地球少咁多樹，真係多得佢哋唔少。

環保觸覺主席譚凱邦炮轟呢班選委，話佢哋身為IT人，理應活用電子方式宣傳，但估唔到佢哋都係用番最古老、最唔環保嘅方法宣傳自己。Johnny話的確有選民反映，話寄咁多磁碟出去唔多環保，但佢死撐呢個世代早已冇人用磁碟，個個用晒光碟，所以呢幾千隻磁碟全部係冇人用嘅倉底貨，唔算大問題。