政壇：煲呔曾「分」章益晒自己友

政府尋日公布委任今年負責決定邊個拎「荷蘭水蓋」（勳章）嘅授勳評審委員會，委員全部都係煲呔曾嘅親信，例如行政會議召集人夏佳理、成員梁智鴻、李業廣、劉遵義等，評審委員會理應每年重新委任一次，但煲呔曾親疏有別，決定畀自己友做多一屆，全部留任。

新一屆授勳名單明年七月至公布，十月至正式授勳。唔好以為唔關煲呔曾事，因為呢個委員會專責幫特首推薦該年度嘅授勳人選，上至大紫荊、金紫荊，下至太平紳士同社會服務獎嘅人選都要經過佢哋手，份名單六月就要畀特首過目並批准，但屆時煲呔曾仲未離任，分餅仔當然分番畀自己友，但份名單曝光後，如果有乜唔妥，社會有爭議時，煲呔曾已經拍拍屁股走咗人，完全唔使孭鑊，而下屆特首就要硬食呢隻死貓。

埋炸彈跣下屆政府

授勳呢啲分餅仔行為，雖然好多人不齒，但有更多人渴望，所以煲呔曾透過呢批自己友分餅仔畀其他自己友，並透過下屆特首雙手頒勳章畀佢哋，咁樣增加自己政治籌碼，埋炸彈跣下屆政府，真係低章手法。可悲嘅係原本為咗嘉許社會人士嘅授勳，已淪為煲呔曾嘅私家權力交換工具。

其實佢醉心玩弄權術，係慣常伎倆，尋日憲報公布咗，佢又委任有煲呔針之稱嘅鄭經翰（大班）做獨立監察警方處理投訴委員會委員，任期仲去到二○一三年尾。大班已經唔係第一次做監警會，煲呔曾明知自己就嚟走，仲益自己友，證明佢呢份人，從來只為自己利益出發。