監管旅業太遲 最怕疊床架屋

尖沙咀星光大道早前被外國網站評為全球十二大「最浪得虛名景點」之一，評價係咪中肯見仁見智，但如果有人冊封旅遊事務署為「最浪得虛名部門」，應該唔會點錯。

點解咁講？即係咁，香港旅遊業近年亂象叢生，劏客醜聞禁之不絕，加強監管已經成為旅遊業嘅當前急務。不過，港府一直闊佬懶理，唔嗲唔吊，負責其事嘅旅遊署係咪徒有虛名先？

呢嗱，港府今年四月推出改革旅遊業規管架構諮詢文件，有諮詢結果嘞。一如外界所料，港府拒絕將監管責任孭番上身，反而建議成立獨立法定機構規管旅遊業，暫名為「旅遊業監管局」，負責旅行社、領隊同導遊嘅發牌同規管工作，而旅遊業議會只保留培訓同協助處理突發事件。

遲到好過冇到，旅議會一向被人批評係自己友管自己友，港府收回監管大權，應該冇乜人會反對。之不過咁，港府監管旅業捨本逐末，棄政府部門不用而假手法定機構，實在不得不令人擔心，日後嘅旅監局會唔會變成一個最浪得虛名嘅官僚架構。

嗱嗱嗱，與旅遊業相關嘅機構本來已有三個，旅遊署睇政策，旅發局搞宣傳，旅議會做監管，本來已經疊床架屋，以後再整多個旅監局，簡直就係一座大而無當嘅超級怪獸屋。大家知啦，三個和尚冇水食係香港特色嘅官僚常規，依家仲加到四個和尚添，萬一旅監局又係有名無實，浪費公帑都算事小，搞冧香港旅遊業塊招牌事大！

話時話，法定機構唔受政府直接管轄，最終搞到亂七八糟，港府根本鞭長莫及。有辦大家睇，好似平機會呀、私隱專員公署呀、旅發局呀，爆醜聞嘅頻密次數仲多過發表工作匯報。港府成立旅監局，萬一又炮製多一個獨立王國出嚟，咁就該煨咯！

一句講晒，旅監局疊床架屋，旅遊署徒有虛名。旅遊業係本港經濟支柱嘅其中一碌，唔理旅監局又好，旅遊署又好，總之港府快快負起責任，整頓亂象，若然旅遊業再爆醜聞，搞到香港蒙羞，禮賓府嗰塊有名無實嘅「福為民開」招牌一定被人拆走，叮！