政壇：朱民年薪西方白菜價
年尾到，打工仔又係時候年終計數。曾做過人民銀行高層、現任國際貨幣基金組織（IMF）副總裁快五個月嘅朱民，都畀人幫佢計吓數，年薪接近三十七點三萬美元，折合約二百九十萬港元，雖然高過晒國有四大銀行嘅行長，仲多起碼一點四倍添，但攞去西方比，又係另一回事！
IMF嘅總裁拉加德嘅年薪超過四十五萬美元，同法國總統薩爾科齊比雖然唔輸蝕，但攞去同標普500大公司嘅個別總裁相比，例如有人三千二百幾萬美元，IMF高層嘅薪酬又當堂被譏為「白菜價」喎，即好廉宜咁解。所以朱民雖然袋多咗，但要分管68國、承擔多國協調合作工作，呢筆錢都可謂辛苦錢。
朱民擔任國際貨幣基金組織副總裁後，年薪雖然倍增，但工作亦辛苦得多。（資料圖片）