政壇：周一鑊獻唱震驚全場
食物及衞生局局長周一嶽日前喺東華籌款活動上獻唱名曲《忘不了你》，結果唱到走音兼甩嘴，笑到網民碌地。尋日佢喺博愛醫院舉辦嘅慈善餐舞會上再揸咪，今次獻唱英文歌，或者上次獻唱太過令人「忘不了」，台下嘉賓唔少都為佢抹一額汗。
博愛主席團為表支持，即揼六十萬元贊助佢獻唱。短短一首歌，每句都萬萬聲，可能就係因為咁，令到周一鑊好有壓力，唱《The Twelve of Never》時，有幾句歌詞尾音都收得唔靚。唱完一曲，台下觀眾好識做，拍爛手掌之餘，仲係咁叫encore，博愛主席團決定再捐六十萬元，支持周一鑊唱多首羅賓漢主題曲《Everything I Do》。有主人家同觀眾嘅支持，周一鑊似乎打咗強心針，愈唱愈淡定，最後都算過關，不過不失啦。
周一鑊唱歌，七情上面，唱到面容扭曲。