政壇：卿姐送花 垃圾桶代收

患有腎衰竭嘅教育局局長孫公孫明揚，日前因為肺炎被送入瑪麗醫院，政圈大表關注，但係孫公到底入咗邊間病房，竟然成為高度機密。白鴿黨副主席劉慧卿前晚一聽到孫公入院，即刻向佢送上慰問花籃一個，據聞花籃要成五百蚊，點知送到醫院時，院方竟懶神秘，送花員想擺低啲花喺病房門外都唔得，搞到卿姐好慶，叫個花店職員將個花籃丟落垃圾桶算數。

孫公入院後住咗喺成人深切治療部，但官方前晚唔肯確認，今年以來，相繼有前商務及經濟發展局局長劉吳惠蘭、中央政策組首席顧問劉兆佳同埋政務司司長林瑞麟入過院，佢哋嘅病況透明度都好低，今次孫公入院又玩收收埋埋，完全冇回應外間嘅批評。事實上高官病情同公眾息息相關，適當嘅資訊係需要嘅。

卿姐尋日就好慶咁話，醫院方面點都唔肯話畀送花員知孫公住喺邊，搞到送花員想擺低啲花都唔得，真係有啲不近人情，卿姐谷住道氣，索性叫送花員揼咗啲花算數，探病搞成咁，真係冇癮。