政壇：蘇錦樑淪紙板人

冷手執個熱煎堆，做咗商務及經濟發展局局長嘅蘇錦樑尋日搞咗場大龍鳳，宣布成立一個法定嘅旅遊業監管局，專責旅行社發牌及監管，呢個架構上嘅大手術，業界傾咗好耐，但商務及經濟發展局卻一直採拖字訣，拖到尋日，難得孭重頭戲嘅蘇錦樑以局長身份帶埋兩名下屬出席記者會，本嚟係出風頭嘅好事，但佢明顯唔熟書，好多問題要由下屬解答，佢嘅功能似布景板多啲。而且業界即刻對行業規管變得架床疊屋有反彈，蘇錦樑睇嚟有排煩！

講唔清有乜成效

蘇錦樑尋日拖住常任秘書長（工商及旅遊）黃灝玄、旅遊事務專員容偉雄出席呢個旅遊業諮詢總結及建議改革路向記者會。自今年中接任局長以來，佢搞競爭法草案都夠晒頭痕，弊在至今冇乜表現，尋日總算有場大龍鳳畀佢攞威，即使啱啱出差返嚟，佢都唔放過。

蘇錦樑總結諮詢結果時大都照稿讀，當然冇乜問題，但到解釋新嘅規管架構、組成方案、甚至將來同旅議會等機構嘅合作時，佢就明顯力不從心，不時要由下屬、負責旅遊事務嘅容偉雄解答，整整吓，記者嘅提問都似乎落咗去容偉雄身上。

大家其中一個最關心嘅問題係旅議會過去被批「自己人管自己人」，咁新嘅旅監局又點呢？蘇錦樑兩次嘅回應都係監管結果會更有效，但點有效？聽佢講都唔明囉！據講，今次成立旅監局，每年要使嘅公帑高達五千萬元，如果現有一切架構冇變嘅話，本港淨係負責旅遊業工作嘅機構就有旅監局、旅發局、旅議會，就算目前嘅旅遊事務署會拆件入旅監局，部分旅議會嘅權力又會收回，但三個架構以後點樣配合，家吓一啲細節都冇，另起爐灶，唔代表可以解決一切問題。