政壇：搞搞政：工聯會派兵郁鼠王芬

出年嘅立法會選舉新增五個超級區議會議席，工聯會領導層早已打晒開口牌，話希望以區議會超級議席產生「風車效應」帶動五區選情，若工聯會一旦喺九龍西派人出選，將同○八年獲佢哋支持嘅專業會議「鼠王芬」梁美芬短兵相接。

三年多過去後，鼠王芬喺替補機制曾發表「選民懲罰論」惹起軒然大波，工聯會內部即時心郁郁想派人參選九龍西取而代之，但據聞，鼠王芬暗中亦扶植多名親兵參選剛過去嘅區議會。

就以油尖旺為例，「雙黃」黃頌同黃建新首度參選就雙雙勝出，至於本身係女將嘅韋海英就喺深水埗南山、大坑東同大坑西選區一舉擊敗民協譚國僑，由委任轉直選嘅陳鏡秋亦成功落戶李鄭屋，連同○八年拍檔參選嘅地區地膽繼續喺地區穩打穩紮，鼠王芬喺地區嘅實力相信有增無減，相反真正以工聯會旗號喺九龍西成功當選嘅區議員真係寥寥可數。

睇嚟工聯會開行大風車，都未必吹得走鼠王芬，仲會有一番惡鬥添！