政壇：規管漁業闖禍肥仔張「一鑊」熟

近期最爆嘅高官，肯定非有「每周一鑊」之稱嘅食物及衞生局局長周一嶽莫屬，佢喺電視上憑一曲《忘不了你》一鳴「驚」人，更畀網民惡搞，封咗佢做「官場技安」。技安嘅歌喉係點？睇佢班朋友仔都避之則吉，大家應該心知肚明，但點知佢唔夠喉，今日再喺電視上獻唱兩首英文歌。不過，勢估唔到隨官場技安嘅魔曲起舞嘅，包括早前因「一滴香」爭拗而變為宿敵嘅富貴黨立法會議員「肥仔張」張宇人，事關肥仔張要幫官場技安，為《二○一一年漁業保護（修訂）條例草案》把關。

呢條草案講嘅，主要係規管香港捕魚業，措施包括要求本地漁船登記、限制新漁船加入、限制非漁船捕魚同埋設立漁業保護區等。建仔立法會漁農界議員「肥根」黃容根，已經做足準備同官場技安死過，肥根為咗保留實力，同時有足夠機會發言，決定請黨友建仔主席譚耀宗代勞，做草案委員會主席，自己就做委員算數。

肥根拚死保衞業界

官場技安肯定聞到陣陣燶味，為免坐以待斃，決定搵人同譚耀宗爭過，但除咗四個泛民同肥仔張，根本揀無可揀，於是佢惟有硬住頭皮請肥仔張出山，令佢慘成「議會阿福」。雖然係宿敵嘅請求，但肥仔張亦不遺餘力，日前已經盡力游說其他議員撐佢。不過「你有張良計，我有過牆梯」，就喺加入草案委員會期限完結前，肥根再搵嚟黨友陳克勤加入，就好似攞魚槍同佢哋死過咁，而肥仔張黨友方剛，同埋專業會議議員石禮謙亦有報名，令戰況相當激烈。

最終結果係點？今日就會揭曉。唔知一旦肥仔張救駕有功嘅話，官場技安會點樣答謝佢呢？又抑或官場技安呢次係搵埋肥仔張攬住一齊死呢？姑勿論點都好，喺今次件事至少證明咗一樣嘢，就係喺政圈中冇永遠嘅朋友或永遠嘅敵人。