港商無路可走 港府竟然袖手

屋漏偏逢連夜雨，船遲又遇打頭風，呢啲滋味內地港商深有體會。歐債危機唔知幾時見底，經濟前景滿布陰霾，加上內地政策變來變去，內憂外患前後夾擊，唔少港商無路可走，惟有關門大吉。

其實，北上搵銀呢支歌仔早就冇得唱喇。曾經港企林立嘅東莞等地，港商近排紛紛拉閘，「開發區」、「工業園」十室九空。根據東莞當局數字，今年頭十個月有四百五十幾間外資企業結業，其中八成屬港資或台資。

唉，無計喇，形勢比人強，開廠最緊要有定單，冇定單就冇工開。最弊就係，金融海嘯元氣未恢復，歐債危機又殺到，衰退陰影揮之不去，定單不斷流失。以前聖誕旺季客戶一早落齊單，今年變咗斷橛禾蟲逐啲落，而且買少見少，有啲廠定單少咗近四成，你話點頂吖。

定單大縮水已經夠傷，咁啱廣東又話要「騰籠換鳥」推行經濟轉型，淘汰低科技、低增值產業，環保要求亦提高咗。而最傷仲係內地實施最低工資後，人工翻咗一番不特止，而且密密咁加，經營成本倍增，慘過攞命。

呢頭經濟冇起色，成本搏命升，嗰頭原材料不斷加價、人民幣不斷升值，港商就算有單都未必敢接，事關分分鐘連本都搵唔番。腹背受敵，撐唔落去，咪焗住拉閘走人咯。

古人話齋，皮之不存，毛將焉附。內地港商求助無門，瀕臨絕境，而港府一於袖手旁觀，好似完全唔關佢哋事咁。其實，如果情況繼續惡化，大批北上搵食嘅港人惟有選擇回流，到時本港就業市場同社會福利必然受到衝擊，點會唔關港府事吖。幫人等於幫自己，協助內地港商渡過難關，等於為香港拆計時炸彈，唔通佢哋連咁嘅道理都唔明？

講開又講，港府一向講多做少，每次被問到點樣幫內地港商，高官例牌表示「密切關注」就算。冇錯，港府喺內地設有多個辦事處，可惜有名無實，辦事處官員除咗出席官方活動飲飲食食之外，唔知做過啲乜。曾經有立法會議員投訴，話想向駐粵辦反映內地港商苦況，點知居然冇人肯見佢。

講真，如果港府有心幫港商嘅，大把嘢可以做。譬如，可以透過減免稅費、融資等方式提供支援，亦可以利用本港科研資源，喺生產自動化同機械化方面提供協助。一句講晒，事在人為，問題係港府肯唔肯做啫。

呢，廣東月初推出多項政策支持當地港資企業轉型升級，發展品牌，拓展內需同國際市場。港商面對困難，廣東省出手相助，而港府就袖手旁觀，關人個關，醜唔醜怪啲吖，叮！