CULTURE o翕： 政義公仔人畫出時弊

這次我們找來80後Jay大少（梁焯圻），與大家分享對創作政治漫畫的看法。

愈來愈多80後關心政治，除參與遊行和組織社會運動外，也開始透過創作政治漫畫表達意見，他們以誇張繪畫手法、抵死對話，達致諷刺時弊效果。香港城市大學應用社會科學系副教授陳國康認為，互聯網出現令表達方式變得多元化，創作政治漫畫可讓年輕人更了解社會，有助提升他們對香港的歸屬感。

Jay大少 80後，漫畫、人像畫freelancer，兼讀媒體設計。他自小喜愛畫畫，○七年開始創作政治漫畫，上載至個人網誌，曾出版政治漫畫《香港搞乜鬼》。

陳國康 香港城市大學應用社會科學系副教授

Jay：自細對畫畫有濃厚興趣，加上屋企比較窮，冇咩娛樂，畫畫就成為最好嘅消閒活動，除畫風景，我最鍾意畫人像。雖然睇過馬龍等嘅政治漫畫，但當時細個未明社會發生咩事。直至九七年香港回歸前後，社會有好多變化，令我開始關心社會議題，例如六四事件，咁我就創作政治漫畫，表達對社會嘅睇法。初期作品只係自己收藏，後來識到一班畫政治漫畫嘅朋友，開始將畫作upload上Blog，同網友分享。

陳：由二○○○年開始，本港明顯多咗一批關心政治嘅新生代，同網絡普及有莫大關係。年輕人可透過互聯網，以多媒體方式表達對社會看法。由於網絡免費，而且傳播度高，撳一撳share，就可將訊息傳千里，影響力亦較以往透過印刷傳媒刊登為大。

Jay：政府有好多政策有問題，對市民唔好，希望透過政治漫畫表達意見，亦得到他人共鳴。眼見身邊部分同年紀朋友，完全唔知社會發生咩事，令我更加想畫多啲，最瘋狂嘅時期，試過日日畫到凌晨三、四點。近期警務處處長曾偉雄嘅黑影論，令人反感，咁啱嗰個記者個名同我全名同音，所以我畫咗幾幅漫畫嚟諷刺一哥，仲加埋自己落去，表達我嘅不滿。

陳：除咗遊行、示威等抗議形式外，創作漫畫唔受時間、空間所限制，因而令愈嚟愈多關心政治嘅年輕人，以創作政治漫畫嚟表達對政府嘅不滿，加上80後特別有創意，創作嘅政治漫畫非常吸引，而且好啜核。

Jay：政治漫畫最緊要係「畫得似」，令人一眼就認出係邊個，咁至會有共鳴。一般政治人物嘅特徵都較易捕捉，好似曾俊華有鬍鬚、任志剛有頭白髮，所以特別容易畫。最近就同朋友整咗一個以諷刺曾蔭權為主題嘅App。本地新聞外，我亦關心國際時事，所以漫畫內容曾包括美國總統奧巴馬等。

陳：相對文字，圖像有較大影響力，容易吸引讀者，較易理解，因此漫畫成為年輕一代表達關心政治嘅途徑。創作政治漫畫可讓年輕人更了解社會，亦有助提升佢哋對香港嘅歸屬感。