政壇：搞搞政：劉美詩復出同徒弟過招

旅遊界近排有矚目人事變動，康泰旅行社前一姐劉美詩（Susanna）久休復出，轉往專業旅運坐鎮，係人都知，康泰太子爺黃進達（Jason）曾係佢高足，依家大家喺唔同嘅機構工作，擺到明壁壘分明哦，問Jason怕唔怕同師傅拗手瓜？佢笑住話，良性競爭係一件好事。

Jason日前出席聖誕派對時，講起師傅Susanna過檔再戰旅遊業界，佢話個幾月前已得知消息，亦曾力邀師傅回巢，但師傅話自己修讀碩士時專修市場學，希望學以致用，所以擔任專業旅運市場及業務發展總經理，合晒心意。正所謂同行如敵國，佢哋好難唔交手啫！Jason就淡定擰頭，話同師傅相處多年，早有默契，將來或有更多合作都未定。今年聖誕旅行團好旺場，好多早已爆滿。Jason話，台灣、韓國及泰國團今年大旺，當中以台灣最吃香，唔使問都知，係多得一齣台灣愛情片大賣帶挈。