政壇：兩任天文台長英皇畢業
天文台兩名前任台長林超英、李本瀅尋日返母校，原來佢哋不但係天文台嘅同事，仲係英皇書院嘅師兄弟添。同樣係校友嘅仲有特首參選人梁振英（CY），唔知林超英撐CY，有冇考慮校友之誼呢？
一九二六年落成嘅英皇書院被列法定古蹟，係第一百零一項法定古蹟，尋日舉行古蹟揭幕儀式，一眾校友都有回校，林超英話，好鍾情英皇嘅紅磚外牆及圓拱形結構，大讚係一座充滿生命力嘅古蹟，佢話英皇同港大只係一街之隔，當年上堂上到悶，同學講笑都會話不如擒上學校後面棵樹逃學。李本瀅就話，最難忘以前重紀律嘅校風，上落堂都要排隊先可以返課室。CY就話，讀小學時已經畀英皇嘅外牆同建築風格深深吸引，因而立志要入英皇。
林超英（右）同李本瀅（左）係天文台同事，又係英皇嘅師兄弟。右圖為英皇書院。