政壇：公專聯勢飛起公文袋

○七年成立嘅公共專業聯盟一直被認為係公民袋嘅衞星組織，因公文袋副主席黎廣德一直係該聯盟主席，隨住黎廣德夠鐘卸任，新任主席莫乃光即刻發威，喺選委會選舉成為資訊科技界（IT界）票王，副主席梁繼昌亦帶領會計界全取九席，結果聯盟傳出醞釀自立門戶嘅聲音，有人建議索性飛起公文袋玩獨立添，成為一個專攻功能界別嘅泛民政團。

如果成事嘅話，公專聯容乜易變成泛民版嘅經濟動力？據講，黎廣德過去公開發言時，通常都唔止用公民袋一個身份，仲會用埋公共專業聯盟個名，結果被批「黨政不分」，唔少聯盟成員亦感不滿，有聯盟成員仲話黎廣德唔鍾意聽人意見，處事手法亦唔夠圓滑，所以上次聯盟換屆選舉，已進行「去公文袋化」，現在做得七七八八。