政壇：林鄭惡鬥望族後人

有「好打得」局長之名嘅發展局局長林鄭月娥個性同施政手法都好強硬，近排因村屋僭建畀鄉事派燒紙紮公仔及棺材，但佢冇有怕，尋日又向背景雄厚嘅何東花園業主下戰書，言明採行動保護何東花園，仲話即使業主反對政府將何東花園列法定古蹟，佢哋嘅行動都唔一定可以阻到政府，言下之意係預咗大家法庭見。林鄭心口掛個勇字去封樓，畀人嘅感覺係佢愈戰愈強……硬！

其他局長提早隱形

由天星碼頭、皇后碼頭到景賢里，香港人對保育愈嚟愈緊張，難怪有成八十年歷史嘅何東花園爭拗都愈演愈烈，下個月底，何東花園被列為暫定古蹟嘅十二個月期限便屆滿，林鄭尋日話，如果政府唔喺呢個時期前做工夫，暫定古蹟期限就冇得延長，何東花園都危矣，所以佢早前已經得到古物諮詢委員會嘅同意，已經通知業主會喺期限前採取法律行動，以永久保護何東花園。

不過，何東花園嘅業主一直反對政府嘅計劃，亦透過致函傳媒等方法圖翻盤，林鄭尋日話：「業主的反對不一定可以阻止我們將它（何東花園）定為法定古蹟」，佢跟住仲話，相信業主都會採取行動，所以佢唔方便講太多，尤其唔適宜令業主感到佢喺公眾場合畀對方任何壓力。雖然係咁，林鄭都強調對方未必可以阻到政府，唔知呢句係咪已經構成壓力呢？甚至感到大石砸死蟹！

應屆政府任期仲有半年多就玩完，唔少政策局長都提早隱咗形，唔講嘅話，仲以為佢哋已經冇做官添。但林鄭近排動作多多，先後同鄉議局、商界撐到行，搞到官場都質疑點解佢咁搏命？官場長壽之道係平平穩穩，好似林鄭咁硬咁勇，真係幾奇o架！