私院賺到盡 港府做幫兇

《搶錢家族》、《搶錢夫妻》呢啲銀幕經典，年輕人未必睇過，不過冇相干，家陣有套真人版《搶錢醫院》上畫，如有雷同，不是虛構，掠水絕招包你眼界大開，嘆為觀止。

消委會調查發現，本港十間私家醫院嘅分娩服務套餐，有九間今年已經或者即將加價，而且加幅離晒譜。以本地產婦為例，個別自然分娩套餐收費調高接近五成，同搶錢冇乜分別。

本來呢，一分錢一分貨，加咗價服務照計相應提高至係，弊在事實啱啱相反。消委會收到涉及私家醫院分娩服務嘅投訴今年大幅上升，淨係頭十個月已經比舊年全年升咗八倍，主要涉及突然加價、收費不清等。收費上天，服務落地，問你服未！

私院搶錢有幾狼？有分娩套餐原本收四萬蚊，產婦臨盆在即，醫院突然加價收五萬。打死狗講價就聽得多啫，臨盆加價，簡直聞所未聞。另一個案，套餐講明係四萬五千蚊，產婦應醫生要求提前剖腹，居然要畀五千蚊「附加費」同萬幾蚊「行政費」，出院埋單要七萬幾，你話係咪離譜吖！

仲有呀，唔少套餐根本唔係套餐，樣樣都另外收費，丈夫陪產、緊急剖腹固然要收錢，甚至連紗布都逐塊計。總之掠得就掠，認錢唔認人。

私院打開門做生意，搵錢至上無可厚非，問題係，大部分私院都以慈善團體名義註冊，不但豁免交稅，而且地皮幾乎都係港府免費或只係以象徵式費用批出。私院着數攞到盡，但就拒絕回饋社會，收費幾多自己話晒事，唯利是圖，所謂慈善，根本係掛羊頭賣狗肉。

叮！私院由非牟利機構變成搶銀機器，話到尾都係醫療衞生當局監管失職、長期縱容嘅惡果。私家醫院一向無王管，每次發生醫療事故，當局調查只係虛應故事。醫管條例半個世紀都冇修改，食衞局局長周一嶽話最快要四年後至統一公私院申報機制，分明係拖得就拖，留畀下一屆政府執手尾。今次消委會踢爆私院狂加價，佢嘅回應又係三幅被，聲稱要加強監管、提升透明度、改善醫療套餐設計，廢話連篇！

私院賺到盡，港府做幫兇。最好笑嘅係，私家醫院無王管，公立醫院更加係烏煙瘴氣，當局仲話要發展乜嘢醫療產業喎，不知所謂。計太一叮話齋，周一嶽身為問責局長，搞到公立醫院唔得，私家醫院又唔掂，即使明年夠鐘落台都係歷史罪人o架咋，叮！