政壇：議員助理爭薪林公公又卸膊

早前都講過，政務司司長林公公做政制及內地事務局局長期間，留低一大堆「種票」炸彈，炸到接手嘅譚志源周身傷，正所謂風水輪流轉，輪都輪到佢執番唐唐手尾嘞！

喺班尊貴嘅立法會議員背後，都有班助理幫佢哋睇文件、做研究同寫講稿等，仲要做埋大小嘅地區工作，但呢班助理嘅人工就因為受政府撥款機制影響，好少有得加人工，加上議員任期一完佢哋就冇得撈，所以流失率好大，好多平均做一至三個月就離職。

呢班做慣幕後嘅議員助理，尋日走上幕前擔正做主角，去政府總部示威，想將過百個跨政黨議員助理嘅聯署交畀林公公，但林公公就搵其他人接信，睇嚟都係想避啦！

聽番佢哋講，年初立法會議員酬金及工作開支償還款額小組已向立法會議員及政治委任制度員薪津獨立委員會提交意見書，希望喺今年十月實施建議，但行政署至今冇作出回應，佢哋今日會再約見行政署長，同政府算帳。