政壇：會計師公會改選爆內鬥
一直以嚟，會計師公會正副會長都係由新選出嘅理事會互選產生。根據慣例，多數都係由副會長升做會長，故今屆會計師公會會長估計都不出趙麗娟同Keith Pogson之爭，正式嘅選舉結果同得票多少，將喺今日AGM內公布。
但今屆AGM同以往有啲唔同，AGM之後「有好戲在後頭」，事關有改革派提出「一人一票選會長」呢個議題，故今日AGM之後仲加插一個EGM（特別大會）。
「一人一票選會長」呢個議題，改革派認為理直氣壯，因為係最合理、最公平嘅選舉方式，但大型會計師行甚至會計師公會本身，就對議案有保留，覺得實際運作有好多技術問題，故最終議案通過機會唔高。無論如何，今日EGM「改革派VS大行」，都係幾引人關注嘅。