排檔需要整頓 高官更要問責

孔子話,「刑罰不中,則民無所措手足。」意思即係,刑罰唔適當,百姓就會無所適從,手足無措喇。

點解太一叮忽然拋書包?係咁嘅,早排旺角花園街排檔發生四級大火,一夜之間奪走九條人命,食環署執法不力成為眾矢之的,當局為咗補鑊,急急推出多項狠辣招數,話要諮詢公眾,嚴厲打擊違規排檔喎。本來呢,當局終於肯正視排檔無王管嘅亂象,決定加強規管,遲就遲咗啲,但點都好過乜都唔做。只可惜,當局一時闊佬懶理,一時又霸王硬上弓,搞到檔主無所適從。呢,有販商怒斥食衞局局長周一嶽趕盡殺絕,「比秦始皇更專制橫蠻」;有販商甚至包圍立法會,仲醞釀大型罷市行動添。

究竟係乜嘢招數引起販商咁大反應?招數包括釘牌、朝行晚拆等等,其中尤以釘牌最辣,檔戶三個月內六次違反《公眾衞生及市政條例》或《小販規例》,就會被取消牌照,最快明年四月實行。話時話,對於屢犯不改嘅檔戶採取釘牌措施,應該唔會有太多人反對,最引起爭議嘅係,《小販規例》包含嘅罪行,例如造成妨礙及販賣未有指明商品等定義模糊,好似一個個陷阱咁,販商動輒得咎,隨時可被入罪,咁就有排拗嘞。

治亂世,用重典,原則上冇錯,但不可不知,排檔之所以烏煙瘴氣、亂象叢生,皆因食環署一直闊佬懶理,執法不力。所以,就算用重典,亦應該合情合理,畀少少寬限期,點可以趕盡殺絕o架。正如立法會議員話齋,當局將花園街大火責任全部推卸畀檔販,似乎好有問題,至於三個月內六次違規就釘牌嘅做法,實在矯枉過正,太過嚴苛。

無論點都好,可一不可再,為避免慘劇重演,販商固然要自律,唔好為一己私利危害公眾安全,而政府更加要好好反省,唔好一味卸膊,賴得就賴。好明顯,食環署今次嘅做法,唔係亡羊補牢,而係賊過興兵,殃及池魚,企圖以辣招掩飾自己管理不善嘅責任,唔怪得販商反應咁激烈喇。

講到尾,排檔需要整頓,高官更要問責。咪話太一叮唔提醒,香港已經夠晒亂,唔該周一嶽做好你份工,快快趣趣同販商團體傾掂佢,如果添煩添亂,再搞出個大頭佛,你吟詩都吟唔甩吖,叮!