政壇：搞搞政：孫公鬥出版商認靠嚇

學與教資源檢討工作小組研究分拆教材訂價同由政府招標出版教科書等減書價嘅建議，結果爛尾收場，變成發展電子書。局長孫明揚前日交代小組報告書時否認爛尾，死撐話係要「引入競爭」，尋日佢終於投降。

話說孫公出席電台節目又再被追問係咪「爛尾」時，佢話：「當時用『分拆』、『招標』呢啲字係過分啲，其實係希望打破壟斷，引入競爭」，然後再為「電子版適用書目」重新制訂新規矩，包括從加入者嘅經營手法、質素同合理價錢等制訂「Q嘜」保證同監察喎。

再追問半年前所講嘅「招標」係咪想嚇出版商？佢似乎被迫承認：「當時係有咁嘅考量，我哋都要表達一個咁嘅意思！」跟住佢又將教科書市場扭曲嘅問題，推番畀即將立法嘅競爭法，話到時會研究吓教科書市場有冇以「合謀訂價」來操控市場。嘩！話咁快，佢就將單嘢卸咗畀商務及經濟發展局嘞！