政壇：李小加獲賞880萬元股份
港交所尋日開董事會，除咗最令人關注嘅港股加時有討論外，據聞亦有討論港交所員工花紅、明年加薪情況如何。港交所尋日就公布，董事會已批准撥出八百八十萬元，用嚟購買港交所股份，以獎勵行政總裁李小加。
睇番舊年嘅獎勵計劃，董事會撥出七百二十萬元，用嚟買股份畀李小加，換言之，今年佢嘅獎勵有得加，大份咗！
再睇番港交所個股價，八百八十萬元，以尋日收市價125.1元計，大約係有70,343股。至於舊年七百二十萬元，按去年當時收市價183.2元計，只買到39,301股，咁李小加份禮真係大咗喎！
