政壇：蘇錦樑被圍插

歐債危機搞到愁雲慘霧，第四季出口預計會持續下跌，對中小企可以話係首當其衝。立法會議員林大輝尋日就問政府可唔可以重推「特別信貸保證計劃」，考慮畀更多中小企暫緩預繳利得稅，以紓緩一下中小企嘅融資困難，點知商務及經濟發展局局長蘇錦樑話，目前已有措施幫中小企，又話大部分嘅中小企更加唔使交稅，而局方會「適時」推出更強硬嘅措施幫業界。就因為佢淨係識得講「適時」，於是又畀班議員圍攻狂插。

依家經濟情況咁唔明朗，但蘇錦樑反而推一條極具爭議性嘅競爭法，幫唔到手之餘仲加重中小企嘅壓力，尋日就畀大輝寸佢，話做乜嘢都要分緩急輕重，但佢仍然淨係識得耍官腔話了解業界需要，會適時推出有力措施，根本就係敷衍，跟住佢不斷追問蘇錦樑乜嘢係「適時」，仲反問蘇錦樑係咪要去到「銀行無錢借，中小企執晒笠」，政府先肯出招？點知蘇錦樑就教番佢咁話，其實經濟措施係好「立體」嘅，然後又重複一次話，目前已經有好多措施幫中小企。

大輝聽到扯火

可能蘇錦樑係想話，一兩個簡單嘅短期措施未必能幫到中小企，但係就講嚟講去都講唔到重點，聽到大輝火都嚟埋，話自己好似雞同鴨講。最後大輝仲話，唔知局長係辭不達意定係對中小企漠視，淨係知佢全程喺度遊花園讀稿喎！

最後連石禮謙同謝偉俊都加入追問戰團，但蘇錦樑就好少理，全程喺度遊花園，死都唔肯正面回應，搞到代主席劉健儀都冇佢符，叫議員喺其他場合先再問局長喎！