麵包含菌高風險 隱而不報實靠害

冇奶油！絕對冇奶油！

點解太一叮猛叫冇奶油呢？開估前，先講一則關於椰絲奶油包嘅消息，就係港府食物安全中心檢測發現，呢款唔少市民早餐常備嘅包點，美味背後原來隱藏惡菌危機，同熱狗被列為「微生物質素欠佳」嘅高風險含菌包類。按食安中心準則，喺溫室存放超過四小時就不宜食用。

香港人常食嘅奶油包同熱狗居然係病從口入嘅大隱患，真定流o架？你知啦，食安中心對食物風險問題一向懵到上心口，今次係咪又搞錯呀？不過咁，食安中心平時烏龍百出，但係今次真係冇搞錯。傳染病醫生指出，奶油同熱狗醬汁係金黃葡萄球菌、沙門氏菌同大腸桿菌嘅孳生溫床，一旦變壞，市民隨時食到肚屙兼肚痛。

油奶包同熱狗係惡菌溫床，好多人唔知哩，梗係啦，食安中心一直隱而不報，市民當然被蒙在鼓裏。依家大家明白啦，太一叮猛叫冇奶油，一來提醒大家，如果習慣買定隔夜麵包做早餐，最好選擇冇奶油嘅；二來咯喎，明知麵包含菌食壞人，食安中心居然冇提醒市民，簡直就係靠害，你話係咪「冇奶油」先？叮！

仲有呀，食安中心嘅最新研究亦發現，市民平日食到致癌物二噁英嘅食物，六成來自海產類，其中以桂花魚同蠔等含量最高，而受砒霜污染最嚴重嘅食品就係通菜、鹹蛋同蠔。不過，食安中心一樣收收埋埋冇公布，令市民對進食風險全不知情。

即係咁，從食安中心嘅角度，呢啲食物風險資訊對外公布咗o架嘞，只不過係選擇性向業界公布咁解。佢哋向麵包業發指引，提醒如果奶油包同熱狗存放超過四小時就要棄掉。喂，食物安全靠業界自律把關，咪即係攞公眾健康賭一鋪？俗語話，樹大有枯枝，若然有邊間麵包舖唔生性，當指引係耳邊風，蒙在鼓裏嘅街坊咪長期大菌食細菌？

所以咯喎，話食安中心已經令人食不安心，真係一啲都無錯。無他嘅，正如醫學界批評，喺港府眼中，業界生意重要過市民嘅健康安全，於是對食物風險資訊咪瞞得就瞞、遮得就遮囉。

太一叮想提醒食安中心，萬一因為你哋知情不報，令到市民病從口入，你哋一樣寢食難安o架咋。市民「冇奶油」要容忍一個專門靠害嘅官僚部門o架，係咪？叮！